1С-тегі СНТ және виртуалды қойма: қадамдық нұсқаулық

1С-те СНТ есепке алу құжатының негізінде ресімделеді: өткізу, орын ауыстыру, жеткізушіге қайтару немесе бөлшек сауда есебі. Құжатта «СНТ» → «Создать СНТ» командасын таңдап, деректерді тексереді, жүкқұжатқа ЭЦҚ-мен қол қойып, ИС ЭСФ-ке жібереді. Алушы СНТ-ны растайды немесе одан бас тартады, ал осы тауарлар бойынша ЭШФ тіркелген жүкқұжаттың негізінде жазылады. Бұл тізбек жұмыс істеуі үшін 1С-те алдын ала виртуалды қойма мен электрондық СНТ қосылып, есепке алу қоймалары виртуалды қоймалармен сәйкестендіріледі. 2026 жылғы 1 қаңтардан бастап СНТ ресімдеудің жаңа қағидалары мен тауарлардың жаңа тізбесі қолданылады. Төменде олардың кімге қатысты екенін, қандай мерзімдер белгіленгенін, 1С-те қадамдарды қалай өту керегін және қай жерде жиі қателесетінін талдаймыз.

СНТ және виртуалды қойма деген не

Тауарларға ілеспе жүкқұжат — тауарлардың қозғалысын бақылауға арналған, соның ішінде оларды тиеп-жөнелтуді растайтын тауарға ілеспе құжат (Салық кодексінің 21-бабының 16) тармақшасы). Ресми қазақша қысқартуы — ТІЖ, бірақ іс жүзінде және 1С бағдарламасында СНТ атауы қалыптасқан, сондықтан мақалада осы аббревиатураны қолданамыз. Ресімдеу қағидаларына сәйкес СНТ бір мезгілде бастапқы бухгалтерлік құжат болып саналады. Ол электрондық шот-фактуралардың ақпараттық жүйесінде (ИС ЭСФ) электрондық түрде ресімделеді. Қағаз түрінде тек бір жағдайда рұқсат етіледі: егер МКК өз сайтында техникалық ақауға байланысты жүйеде ресімдеу мүмкін еместігін растаса.

Виртуалды қойма — Қазақстан аумағында тауарларды қадағалап отыруды автоматты режимде қамтамасыз ететін ИС ЭСФ модулі. Салық төлеушінің әр қоймасының өз ID нөмірі бар, ал әр тауар позициясына тауар ID-і автоматты түрде беріледі. Тауар виртуалды қоймаға СНТ, тауарларға арналған декларациялар, «Қалдықтар» және «Өндіріс» нысандары арқылы кіріске алынады. Есептен шығару СНТ, тауар ID-і бар БКМ чегі бойынша, ал жекелеген жағдайларда жүкқұжатсыз жүреді.

Қағидалар виртуалды қоймалардың төрт түрін бөледі: негізгі «Қойма» (бірнешеу болуы мүмкін), «Бөлінбеген қойма», «Сату нүктесі» және «Архив». Сонымен қатар қойманың белгісі болады. Мысалы, «Басымдылық берілген қойма» тауарды автоматты түрде кіріске алу мен есептен шығаруға арналған. «Жария қойманы» сатып алушы жеткізушіге тиеп-жөнелту кезінде таңдау үшін ашады. Лизингке, алыс-беріс шикізатына және бірлескен қызметке арналған қоймалар да бар.

2026 жылы СНТ-ны кім ресімдеуге міндетті

2026 жылғы 1 қаңтардан бастап Қаржы министрі міндетін атқарушының 2025 жылғы 31 қазандағы № 657 бұйрығы қолданылады. Ол тауарлардың жаңа тізбесін және СНТ ресімдеу қағидаларын бекітті, ал бұрынғы № 1424 бұйрық күшін жойды. Тізбеде тоғыз жол бар:

Тізбе жолы	Тауарлар	СНТ қашан керек
1–6	Биоотын; этил спирті және алкоголь өнімі; мұнай өнімдерінің жекелеген түрлері; газохол, бензанол, нефрас, жеңіл көмірсутектер қоспасы, экологиялық отын; сұйытылған мұнай газы; есірткі құралдары, психотроптық заттар және прекурсорлар	Қазақстан аумағында орын ауыстыру, өткізу және тиеп-жөнелту; ЕАЭО-ға мүше емес елдерге әкету
7	ЕАЭО-дағы қадағалап отыру тетігі туралы келісім бойынша қадағалануға жататын тауарлар	Қазақстан аумағында өткізу; ЕАЭО-ға мүше емес елдерге әкету
8	ЕАЭО елдерінен әкелінетін кез келген тауар	Әкелу кезінде, жүк көтергіштігі 2,5 тоннаға дейінгі жеңіл автокөлікпен әкелуді қоспағанда
9	ЕАЭО елдеріне әкетілетін кез келген тауар	Әкету кезінде, дәл осындай ерекшелікпен

2026 жылғы 1 қыркүйектен бастап 7-жолдағы қадағаланатын тауарларға тұрмыстық тоңазытқыштар мен мұздатқыштар, кір жуғыш машиналар және теледидарлар жатады: Еуразиялық экономикалық комиссия Кеңесінің 2026 жылғы 26 қаңтардағы № 5 шешімі бойынша барлығы ЕАЭО СЭҚ ТН-ның 34 коды. Оларға СНТ виртуалды қойма арқылы ресімделеді, ал ЭШФ СНТ негізінде жазылады.

СНТ-ны жеткізуші ресімдейді, ал әкелу кезінде — алушы. Тауар жеке тұлға үшін ЕАЭО-дан автокөлікпен әкелінсе немесе ЕАЭО-ға әкетілсе, СНТ-ны тасымалдаушы, яғни экспедитор немесе курьерлік қызмет ресімдейді. Тізбедегі тауарлар үшін жүкқұжат бір компания ішінде, соның ішінде оның бөлімшелері арасында орын ауыстырғанда да қажет. Бұған 6 және 7-жолдардағы тауарлардың Қазақстан аумағы бойынша орын ауыстыруы кірмейді. Тауар автокөлікпен тасымалданса, СНТ әр көлік құралына жеке ресімделеді.

СНТ қай кезде қажет емес

Қағидалардың 15-тармағы бойынша СНТ, атап айтқанда, мына жағдайларда ресімделмейді:

• БКМ чегімен, терминал арқылы немесе төлем картасымен жүретін бөлшек сауда, сондай-ақ жеке тұлғаларға электрондық ақшаға сату;
• АЖҚС-тың 3, 4 және 5-жолдардағы отынды бөлшек саудада сатуы;
• магистральдық құбыржолдар мен электр беру желілері арқылы әкелу және әкету;
• бір тұлғаның бір мекенжайда орналасқан үй-жайлары арасында тауардың орын ауыстыруы;
• қайтарылатын ыдысты тиеп-жөнелту (коды ДСҰ алып қою тізбесіне енген ыдысты ЕАЭО-ға әкетуді қоспағанда);
• жеке тұлғалардың жеке пайдалануға арналған тауарларды әкелуі және әкетуі.

СНТ мерзімдері: ресімдеу, растау, түзету

Әрекет	Мерзім	Негіз
Тиеп-жөнелту, ҚР бойынша орын ауыстыру және әкету кезінде СНТ ресімдеу	Орын ауыстыру, өткізу немесе тиеп-жөнелту басталғаннан кешіктірмей	СК 179-бабы, Қағидалардың 16-тармағы
ЕАЭО-дан әкелу кезінде СНТ ресімдеу	ҚР мемлекеттік шекарасын кесіп өткенге дейін	СК 179-бабы, Қағидалардың 16-тармағы
СНТ-ны растау немесе одан бас тарту (алушы)	Тіркелген күннен бастап 10 күнтізбелік күн; көлікпен жеткізілсе — 20 жұмыс күні	Қағидалардың 17-тармағы
Қатесі бар немесе алушы жауап бермеген СНТ-ны түзету не кері қайтарып алу (жеткізуші)	Сол 10 күнтізбелік немесе 20 жұмыс күні	Қағидалардың 19-тармағы
ЭШФ жазылып қойған, бас тартылған СНТ-ны түзету	Бас тартылғаннан кейін 3 жұмыс күнінен кешіктірмей	Қағидалардың 30-тармағы
ИС ЭСФ ақауынан кейін СНТ ресімдеу немесе растау	Жүйе қалпына келгеннен кейін 3 жұмыс күні ішінде	Қағидалардың 29-тармағы
Ақау кезінде қағазға ресімделген СНТ-ны ИС ЭСФ-ке енгізу	Ақау жойылғаннан кейін 3 жұмыс күні ішінде	Қағидалардың 44-тармағы

Экспорт кезінде, 3 және 4-жолдардағы тауарларды түпкілікті тұтынушыға өткізгенде және «Шағын сауда нүктесіне» сатқанда алушының растауы талап етілмейді. Оңайлатылған декларация режиміндегі, бөлшек саудамен немесе қоғамдық тамақтанумен айналысатын және деректерді тіркеп, беру функциясы бар БКМ қолданатын сатып алушы осылай аталады. Бұл белгіні ИС ЭСФ өзі қояды. ЕАЭО-дан әкелу немесе ЕАЭО-ға әкету бойынша СНТ-да шекарадан өту белгісі қойылса, оны кері қайтарып алуға болмайды.

Виртуалды қойма арқылы кім жұмыс істейді

Мұнда екі түрлі тізбені ажырату маңызды.

1. «Виртуалды қойма» модулі арқылы СНТ. 1–7-жолдардағы тауарларға жүкқұжат модуль арқылы ресімделеді. ЕАЭО-дан әкелу мен ЕАЭО-ға әкетуге арналған СНТ (8 және 9-жолдар) жалпы ереже бойынша модульсіз ресімделеді (Қағидалардың 7-тармағы).
2. «Виртуалды қойма» модулі арқылы ЭШФ. Жеке тізбе 2025 жылғы 31 қазандағы № 661 бұйрықпен бекітілген. Онда ЕАЭО СЭҚ ТН кодтары бойынша 353 позиция бар: спирт, шарап, сыра және басқа алкоголь, мұнай өнімдері мен битум, сұйытылған газдар, бірқатар химиялық заттар мен прекурсорлар, тұрмыстық тоңазытқыштар мен мұздатқыштар. Мұндай тауарларға ЭШФ модуль арқылы жазылады. Бұл міндет ҚҚС төлеуші емес тұлғаларға да қатысты, егер тауар оларға виртуалды қоймада есепке алынып түссе (Салық кодексінің 208-бабы 1-тармағының 10) тармақшасы).

2026 жылғы тамызда Қаржы министрлігі № 661 бұйрықтағы тізбеге ауыл шаруашылығы өнімін және ең төменгі баға деңгейі белгіленген тауарларды қосуды көздейтін жобаны талқылауға шығарды. Талқылау 2026 жылғы 1 қыркүйекке дейін жүрді. Бұл өзгеріс сізге қатысты ма, соны шешпес бұрын бұйрықтың қолданыстағы редакциясын adilet.zan.kz сайтынан тексеріңіз.

«Қалдықтар» және «Өндіріс» нысандарына енгізілетін мәліметтер қоймадағы нақты қалдықтарға сәйкес келуге тиіс (Қағидалардың 6-тармағы). ЕАЭО-дан бөлшектеп әкелінген тауар виртуалды қоймада «Жиынтықтау» нысанымен құрастырылады. 1–7-жолдардағы тауарлар виртуалды қоймадан мына жағдайларда СНТ-сыз есептен шығарылады:

• тауар ID-і бар БКМ чегі бойынша сатылғанда — сатылған күннен бастап 16-күнтізбелік күні автоматты түрде;
• өз мұқтажына, өндірісте, жұмыс орындауда және қызмет көрсетуде пайдаланғанда;
• бүлінгенде, жоғалғанда, ұрланғанда, кәдеге жаратылғанда;
• қадағалап отыру тоқтатылғанда;
• «Шағын сауда нүктесіне» жеткізілгенде — СНТ ресімделгеннен кейін 30 күнтізбелік күн өткен соң автоматты түрде.

1С-ті СНТ мен виртуалды қоймаға қалай дайындау керек

Төмендегі қадамдар «1С:Бухгалтерия 8 для Казахстана» 3.0 редакциясы үшін конфигурация құжаттамасы мен ол бойынша әдістемелік материалдарға сүйеніп сипатталған. «1С:Управление торговлей для Казахстана» бағдарламасында да СНТ, ЭШФ және виртуалды қойманың электрондық құжаттары (ЭДВС) тетіктері бар. Мәзір мен батырмалардың атаулары 1С-тің орысша интерфейсіндегідей келтірілген, әр релизде сәл өзгеше болуы мүмкін.

Баптауды бастамас бұрын бағдарлама нұсқасын тексеріңіз. ИС ЭСФ-пен тікелей алмасу «1С:ЭСФ для Казахстана» сервисі арқылы жүреді, ал ол ЭШФ, ЭАВР және СНТ-ны тек 1С:ИТС шарты қолданыста тұрған ПРОФ және КОРП нұсқаларында жібереді. Базалық нұсқада құжаттарды тек XML-ге түсіріп, порталға жүктеуге болады. Бағдарлама мен лицензиялардың құны туралы «1С Қазақстанда 2026 жылы қанша тұрады» мақаласында жазылған.

1-қадам. Виртуалды қойманы қосыңыз

«Администрирование — Функциональность» бөлімінің «НДС» қойындысында «Виртуальный склад» белгісін қойыңыз. Содан кейін «Администрирование — Общие настройки — Виртуальный склад» бөлімінде «Помощник перехода на учет товаров ВС» көмекшісін іске қосыңыз. Көмекші бірнеше кезеңнен өткізеді: көшу күні, ИС ЭСФ-ке қосылу, ЭДВС үшін бағаны таңдау, виртуалды қойманың жаһандық анықтамалығын (ГСВС) жүктеу, виртуалды қоймаларды баптау, шығу тегі көздерінің 2.0 нұсқасына көшу және қалдықтарды жіберу. Көшу бір рет қана орындалады және оны кері қайтаруға болмайды, сондықтан алдымен базаның сақтық көшірмесін жасаңыз.

2-қадам. Электрондық СНТ-ны қосыңыз

«Администрирование — Общие настройки — Электронные сопроводительные накладные» бөлімінде «Использовать электронные СНТ» тұрақтысын орнатыңыз. Ол виртуалды қоймадағы тауар есебіне көшкеннен кейін ғана қолжетімді болады.

3-қадам. Қоймаларды сәйкестендіріңіз

«Соответствие складов и виртуальных складов» мәліметтер регистрінде әр есепке алу қоймасын виртуалды қоймамен байланыстырыңыз. Сонда СНТ құрған кезде ұйымның виртуалды қоймасы туралы деректер автоматты түрде толтырылады.

4-қадам. Контрагенттердің қоймаларын жүктеңіз

Сатып алушылардың жария қоймалары «Виртуальные склады контрагентов» анықтамалығында сақталады. Оларды «Помощник получения виртуальных складов контрагента» жүктейді: контрагенттерді белгілеп, олардың қоймаларын ИС ЭСФ-тен алып, қажеттісін таңдайсыз.

5-қадам. Номенклатураны тексеріңіз

Тауардың тізбелерге кіретін-кірмейтіні және виртуалды қоймада қалай есепке алынатыны СЭҚ ТН кодына байланысты. Алғашқы тиеп-жөнелтуге дейін тауар карточкаларындағы кодтар мен өлшем бірліктерін тексеріңіз.

1С-те СНТ-ны қалай жазу керек: қадам бойынша

1. Есепке алу құжатын ресімдеңіз. СНТ «Реализация ТМЗ и услуг», «Перемещение ТМЗ», «Возврат ТМЗ поставщикам» немесе «Отчет о розничных продажах» құжаттарының негізінде құрылады.
2. СНТ құрыңыз. Құжат формасында немесе тізімде «СНТ» → «Создать СНТ» командасын таңдаңыз. 1С жүкқұжатты негіз құжаттың деректерімен толтырады. Өткізу үшін «Первичная» түрі мен «Реализация товаров» операция түрі, ал орын ауыстыру үшін «Перемещение товаров» қойылады.
3. Деректерді тексеріңіз. Тиеп-жөнелту қоймасын, алушының қоймасын, атауларды, СЭҚ ТН кодтарын, санын және көлік туралы мәліметтерді салыстырыңыз. Тауар екі көлікпен кетсе, екі СНТ қажет.
4. Қол қойып, жіберіңіз. СНТ тек ағымдағы күнмен жазылады: жіберу кезінде 1С ресімдеу күнін бүгінгі күнге ауыстырады. ИС ЭСФ-те тіркелгеннен кейін жүкқұжатқа тіркеу нөмірі беріледі.
5. Мәртебесін қадағалаңыз. Алушы жауап бергенше тауар виртуалды қоймада резервте тұрады. Расталғаннан кейін ол есептен шығарылады, ал бас тартылса немесе кері қайтарып алынса, резерв алынып тасталады.
6. СНТ негізінде ЭШФ жазыңыз. Тіркелген СНТ-да «ЭСФ и СФ» батырмасын басыңыз. 1С бір мезгілде «Счет-фактура (выданный)» және «Электронный счет-фактура» құжаттарын құрады, ал СНТ нөмірі мен күні «Документы поставки» бөліміне түседі.

Жүкқұжат немесе шот-фактура жіберілмесе, себебі әдетте ЭШФ-тегідей болады: NCALayer, ЭЦҚ кілті, ИТС шарты немесе ескірген релиз. Тексеру реті «ЭШФ 1С-тен жіберілмейді» мақаласында талданған.

Кіріс СНТ: растау және кіріске алу

1. «Покупка — Электронные сопроводительные накладные на товары (полученные)» бөлімін ашып, «Получить» батырмасын басыңыз. 1С ИС ЭСФ-тен СНТ-ны жүктейді.
2. Жүкқұжатты нақты алынған тауармен салыстырып, «Подтвердить» немесе «Отклонить» батырмасын басыңыз. Мерзім — 10 күнтізбелік күн, ал көлікпен жеткізілсе — 20 жұмыс күні.
3. «Создать первичный документ» батырмасын басыңыз. «Поступление ТМЗ и услуг» СНТ деректерімен толтырылады, ал жүкқұжаттың өзінде есепке алу құжатына сілтеме пайда болады.

Тауарды қайтару тәртібі мынадай. СНТ-дан бас тартылса, жеткізуші тауарды «бас тартылған» мәртебесі бар сол жүкқұжат бойынша өз қоймасына қайтарады. СНТ расталып қойса, алушы қайтаруға арналған СНТ ресімдеп, бастапқы жүкқұжаттың тіркеу нөмірін көрсетеді.

ЕАЭО-дан әкелу

Әкелу кезінде бастапқы СНТ-ны алушының өзі шекарадан өткенге дейін ресімдейді. 1С-те оны берілген СНТ тізімінде қолмен немесе «Импорт» операция түрі бар «Поступление товаров и услуг» құжатының негізінде енгізеді. Содан кейін жүкқұжатты жіберіп, растайды және «Еще — Получить идентификаторы товаров» командасымен тауар ID-лерін алады. 1–7-жолдардағы тауарлар бойынша бастапқы СНТ деректері 328.00 нысанымен (тауарларды әкелу және жанама салықтарды төлеу туралы өтініш) салыстырылады. Мұны мемлекеттік кірістер органдары салықтың төленгенін растағаннан кейін 10 жұмыс күні ішінде жасау керек. 1С-те бұған «Сопоставление СНТ с ФНО 328.00» құжаты арналған.

СНТ мен ЭШФ қалай байланысты

• ЭШФ СНТ негізінде жазылады. СНТ талап етілетін тауарлар бойынша электрондық шот-фактура соның негізінде жазылады (Қағидалардың 28-тармағы, Салық кодексінің 180-бабының 3-тармағы).
• СНТ нөмірі 32-жолда көрсетіледі. ЭШФ-тің «Тауарлардың, жұмыстардың, көрсетілетін қызметтердің жеткізілгенін растайтын құжат» деген 32-жолында тіркелген СНТ-ның нөмірі мен күні көрсетіледі.
• Тауар деректері бірдей. СНТ мен ЭШФ-те олар сәйкес келеді. Тек құны мен сапалық және сандық сипаттамалары өзгеретін тауарлардың деректері ғана өзгеше болуы мүмкін (олардың СЭҚ ТН кодтары Қағидалардың 2-қосымшасында берілген).
• Алдымен СНТ, содан кейін ЭШФ. СНТ тиеп-жөнелту басталғанға дейін ресімделеді. ЭШФ айналым жасалған күннен ерте емес және одан кейін 15 күнтізбелік күннен кешіктірілмей жазылады (Салық кодексінің 493-бабының 1-тармағы).
• Бас тарту және кері қайтарып алу. Алушы СНТ-дан бас тартса, оның негізінде жазылған ЭШФ 3 жұмыс күнінен кейін жойылады. Түзетілген СНТ мен түзетілген ЭШФ-ні жеткізуші сол 3 жұмыс күні ішінде ресімдейді. СНТ кері қайтарып алынғанда онымен байланысты ЭШФ те жойылады.

Бұл ережелерді сақтаудың ең оңай жолы — ЭШФ-ні порталда қолмен термей, 1С-те СНТ-дан командамен құру.

СНТ ресімдеудегі жиі қателер

• СНТ көлік кеткеннен кейін жазылады. Мерзім — тиеп-жөнелту басталғаннан кешіктірмей. Жүкқұжатты өткізу құжатынан кейін бірден, тиеуге дейін ресімдеңіз және бұл міндетті нақты қызметкерге жүктеңіз.
• Бірнеше көлікке бір СНТ. Қағидалар әр көлік құралына жеке жүкқұжат талап етеді. Тиеп-жөнелту екі рейспен жүрсе, оны екі құжатқа бөліңіз.
• Жүкқұжаттағы сан нақтысымен сәйкес келмейді. СНТ-ны жібермес бұрын санын нақты тиеп-жөнелтумен салыстырыңыз. Қате бәрібір өтіп кетсе, Қағидалардың 19-тармағындағы мерзімде, яғни тіркелген күннен бастап 10 күнтізбелік немесе 20 жұмыс күні ішінде түзетілген СНТ ресімдеңіз.
• ЭШФ СНТ-дан өзгеше. Бұл көбіне шот-фактура қолмен жазылғанда болады. Оны СНТ-дан құрыңыз, сонда тауар бөлігі сәйкес келеді.
• Сатып алушы СНТ-ға жауап бермеді. Расталмаған және бас тартылмаған жүкқұжатты жеткізуші мерзімінде түзетуге немесе кері қайтарып алуға тиіс. Берілген СНТ тізіміндегі мәртебелерді қадағалаңыз.
• Бас тартылған СНТ 3 жұмыс күні ішінде түзетілмеді. Оның негізіндегі ЭШФ жойылады, ал түзетілген СНТ мен ЭШФ-ні Қағидалардың 30-тармағындағы мерзімді бұзып ресімдеуге тура келеді. Бас тартылған жүкқұжаттарды күн сайын тексеріп отырыңыз.
• Қоймалар сәйкестендірілмеген, қалдықтар алшақ. СНТ басқа қойманы көрсетеді немесе толтырылмайды. Сәйкестендіруді жасап, 1С-тегі қалдықтарды виртуалды қоймамен үнемі салыстырыңыз.
• ЕАЭО-дан әкелу немесе ЕАЭО-ға әкету СНТ-сындағы қате. Шекарадан өту белгісі қойылғаннан кейін мұндай жүкқұжатты кері қайтарып алу мүмкін емес. Оны көлік шыққанға дейін тексеріңіз.

ӘҚБтК-нің 283-1-бабы бойынша айыппұлдар

Құқық бұзушылық	Шағын бизнес	Орта бизнес	Ірі бизнес
СНТ-ны ұсынбау немесе уақтылы ұсынбау	10 АЕК	20 АЕК	30 АЕК
СНТ-дағы тауар атауының сәйкес келмеуі, санын (көлемін) анық көрсетпеу	20 АЕК	40 АЕК	50 АЕК
СНТ-ны ресімдемеу	50 АЕК	100 АЕК	200 АЕК

СНТ ресімделмесе, айыппұлдан бөлек құқық бұзушылыққа қатысты алкоголь, мұнай өнімдері немесе биоотын тәркіленеді. Бір жыл ішінде қайталанған құқық бұзушылық үшін айыппұл мөлшері жоғары.

Қорытынды: тексеру парағы

• Тауарларды екі тізбемен салыстырыңыз: СНТ тізбесі (№ 657 бұйрық) және виртуалды қойма арқылы ЭШФ тізбесі (№ 661 бұйрық).
• Бағдарламаңыз ПРОФ не КОРП нұсқасы екенін, 1С:ИТС шарты қолданыста екенін және 1С:ЭСФ сервисі қосылғанын тексеріңіз.
• 1С-те виртуалды қойма мен электрондық СНТ-ны қосып, қоймаларды сәйкестендіріңіз, контрагенттердің қоймаларын жүктеңіз.
• СНТ-ны тиеп-жөнелту басталғанға дейін, әр көлікке жеке ресімдеңіз.
• Кіріс СНТ-ға 10 күнтізбелік күн ішінде, ал көлікпен жеткізілсе 20 жұмыс күні ішінде жауап беріңіз.
• ЭШФ-ні қолмен емес, СНТ-дан жазыңыз.
• Бас тартылған СНТ-ны 3 жұмыс күнінен кешіктірмей түзетіңіз.
• Виртуалды қоймадағы қалдықтарды есеппен және нақты қалдықпен үнемі салыстырыңыз.

Егер компанияңызда СНТ әлі порталда қолмен терілсе немесе алмасу үзіліп тұрса, AC PRO 1С-тен ЭШФ мен СНТ жазуды және виртуалды қоймамен жұмысты баптайды. Алматыда және бүкіл Қазақстан бойынша қашықтан жұмыс істейміз. Қойманы 1С:УТ-та жүргізетін сауда компанияларына СНТ-ны 1С:Сауданы басқару бағдарламасын енгізу барысында баптаймыз. Ал 1С сүйемелдеуі ИС ЭСФ өзгерістеріне сай релиздерді уақтылы орнатуға көмектеседі.